Apoiamos ás estudantes en folga de fame de Manchester
Nós, estudantes da Universidade de Manchester, onte día 27 de abril de 2017 comezamos unha folga de fame coas 1500 presas políticas palestinas que xa a comezaron o pasado 17 de abril de 2017. Moitas delas son menores de idade e están a pasar anos dentro dos cárceres do Estado de Israel. A súa folga persegue o cumprimento dos Dereitos Humanos máis básicos: a posibilidade de contacto telefónico coas familias, asistencia médica, recuperar as súas posesións confiscadas na súa entrada en prisión, a fin do illamento e a abolición da detención administrativa sen cargos ou xuízo.
Hai décadas, a loita solidaria do estudantado foi unha peza clave na caída do réxime de segregación (apartheid) en Sudáfrica. Ademais, o movemento estudantil sempre xogou un papel principal no apoio a moitas loitas anti-racistas e anti-imperialistas. A loita pola liberación do pobo palestino non é diferente, xa que este leva 70 anos vivindo nun réxime de opresión sistemática, con miles de asasinatos, o desprazamento forzado da poboación, racismo institucional e segregación. O noso deber é posicionarnos en solidariedade con el e con todo movemento que loite pola autodeterminación dun pobo.
Como estudantes, sentimos a responsabilidade de apoiar a causa palestina. A través das nosas taxas universitarias estamos financiando a Universidade que, en contra da nosa vontade, apoia o réxime de segregación israelí. Coma a maioría das universidades irlandesas, inglesas e escocesas, a Universidade de Manchester inviste millóns de libras en empresas que son cómplices do sufrimento da poboación palestina. Un exemplo disto é a colaboración con Caterpillar, unha compañía que fabrica escavadoras que o exército de Israel emprega para esnaquizar as vivendas das familias palestinas.
Non só é o noso dereito protestar contra isto, senón que é o noso deber rematar con esta inxustiza. Queremos estar no bando correcto.
Aínda non hai comentarios
Por que non ser a primeira