25 Abril. Das aulas ás rúas,pola defensa do noso ensino!

Entre as resolucións da nosa V asemblea nacional estaba o compromiso de ERGUER de recuperar a mobilización estudantil. Isto materialízase hoxe co anuncio da convocatoria de folga en todos os niveis do ensino para o vindeiro 25 de abril.

Sobran os motivos. Dende a pandemia do covid a situación do estudantado galego non fixo máis que empeorar. Non podemos aturar máis o constante avance privatizador no ensino, que atenta sobre o noso dereito á educación. É preciso defendermos os nosos intereses, defender o ensino público.

O estudantado universitario tivo ver como se aprobaba, dándolle totalmente as costas, a nova Lei Orgánica do Sistema Universitario (LOSU). Deixandonos unha universidade máis antidemocrática e opaca, subordinada ás exixencias do mercado e permitindo a intromisión da empresa privada na universidade pública. Institucionalizando e limitando os dereitos das estudantes. Ademais de deixar fóra cuestións fundamentais como a lingua, as prácticas remuneradas ou o acceso á universidade.

En canto ao ensino medio dende a LOMCE e agora coa LOMLOE perpetuase un sistema elitista que favorece aos centros concertados-privados, que afasta as estudantes do galego e da nosa realidade nacional e que limita o pensamento crítico.

Levamos anos vendo como se fomenta a FP dual, que non é máis que a privatización encuberta da FP, creada para xerar man de obra aínda máis barata e que retrocede en dereitos para as estudantes en prácticas.

Un exemplo claro do avance das políticas privatizadoras do ensino e a autorización para a creación da primeira universidade privada no noso país, da man de Abanca. Isto provocará unha maior elitización do ensino universitario e facilitará, aínda máis, a intromisión de empresas privadas no noso ensino.

O acceso ao ensino superior e un dos factores nos que está a afectar a actual suba de prezos ás estudantes. Faltan medidas que garantan o noso dereito a educación como o aumento de prazas nas residencias públicas, unha suba nas bolsas para que cheguen a tas as estudantes que as necesitan e cubran realmente as necesidades do curso, así como o fin das taxas universitarias.

Todos os sectores do ensino están a verse afectados por esta vaga privatizadora e centralista, por iso é necesario que pasemos á acción na defensa dos nosos intereses. Estamos fartas xa da situación e de que o mercado xogue co noso futuro, e por iso debemos actuar non só nas aulas, senón tamén nas rúas. Dende Erguer temos claro que a única solución para garantir un sistema educativo que se adapte ás necesidades do estudantado galego é a aposta por unha Lei Galega de educación. O ensino no noso país é profundamente desgaleguizador e colonial. Unha Lei Galega de Educación deseñada pola comunidade educativa é a oportunidade para construír un modelo distinto, pensado por e para as estudantes galegas.

Por todos estes motivos e coa intención de recuperar a capacidade mobilizadora que o estudantado sempre tivo; comezaremos a traballar desde o día de hoxe na campaña de folga, que culminará coas distintas mobilizacións do 25 de abril, que serán anunciadas nos vindeiros días.

Dende Erguer animamos a todo o estudantado a organizarse e mobilizarse nas súas vilas ou cidades.Este 25 de Abril, saímos “Das aulas ás rúas, pola defensa do noso ensino!”