O estudantado galego con Palestina
Paremos o xenocídio. Galiza con Palestina.
Dende Erguer. Estudantes da Galiza como organización internacionalista e antiimperialista defendemos a igualdade e a paz entre pobos, así como o fin das dinámicas de opresión e explotación das nacións asoballadas do mundo. As estudantes galegas non podemos ficar indiferentes ante o xenocidio que Israel está cometendo contra o pobo palestino.
A actual ofensiva das forzas armadas israelís contra a poboación de Gaza non é máis ca unha nova fase no proceso de limpeza étnica de Palestina que dura xa máis de 75 anos. A expulsión do pobo palestino do seu territorio e o asentamento neste de colonos israelís é o principal obxectivo da política militar do Estado de Israel dende a súa creación, así como a súa razón mesma de existir. É esta actitude colonial a que explica a desproporcionada resposta israelí fronte á actuación da resistencia palestina que serviu como pretexto para desencadear a actual ofensiva en Gaza, así como os numerosos ataques contra a poboación civil e instalacións de axuda humanitaria ou o corte de subministración básica como luz e auga.
A defensa dunha educación crítica e internacionalista lévanos a denunciar tamén a actitude de silencio, cómplice co xenocidio, da chamada “comunidade internacional”, dos gobernos occidentais e de numerosas institucións, entre elas algunhas universidades que manteñen convenios co estado sionista. Silencio que contrasta coa vehemencia coa que se condena calquera acto de resistencia por parte do pobo palestino. Neste sentido, cabe sinalar especialmente o papel do Estado Español e da Unión Europea como cómplices dos crimes do Estado de Israel co que manteñen estreitas relacións diplomáticas e comerciais, incluíndo mesmo a exportación de armas e material militar.Como estudantes tamén dunha nación asoballada, queremos amosar a nosa solidariedade co pobo palestino na súa loita pola liberdade e polo dereito a existir en paz. Por iso, chamamos ao estudantado galego a mobilizarse este sábado, ás 18:00h na Alameda de Compostela, contra o xenocidio do pobo palestino
O estudantado galego con Palestina!
Galiza con Palestina!
Palestina Vencerá!
Aínda non hai comentarios
Por que non ser a primeira