Quem somos?
Após vários anos realizando açons conjuntas no seio da luita estudantil, a meados de 2015 as três organizaçons estudantis nacionalistas e independentistas (Agir, Comitês e Liga Estudantil Galega) anunciávamos a intençom de começar a caminhar cara á unidade orgánica, pondo em comum umha série de mínimos e objetivos. O passado setembro começamos com este processo destinado á constituiçom de umha nova organizaçom estudantil para Galiza. Assim começamos com assembleias abertas por todo o país, que depois dum quadrimestre de posta em comum concluiram o 5 de março com a Assembleia Nacional Constituinte de Erguer. Estudantes da Galiza.
Erguer. Estudantes da Galiza é a ferramenta unitária do estudantado galego, formada neste 2016 através dum processo de assembleias abertas em que se coletivizou o projeto entre o estudantado de todo o país. As estudantes nom organizadas até o momento, junto aos membros destas três organizaçons, unimo-nos o passado 5 de março em Compostela, sob o lema “Libera e transforma Galiza desde as aulas”. Assim nasceu Erguer como nova organizaçom que une o estudantado nacionalista e independentista galego.
A partir de entom, continuamos com as luitas que desde o nascimento do movimento estudantil na Galiza se venhem levando a cabo, trabalhando por um ensino galego, público, democrático, laico, de qualidade e nom patriarcal.
Desde Erguer. Estudantes da Galiza luitamos por um ensino público, ao serviço do povo galego e pensado por e para a Galiza!
