Apoiamos a mobilizaçon do CEIP Igreja de Chapela

As estudantes e as famílias do colégio de educaçom primária Igreja, na paróquia de Chapela (Concelho de Redondela), estám a viver umha situaçom de incerteza com o futuro do seu centro e da situaçom das crianças. O colégio está situado no médio das obras de ampliaçom dos carris da AP9, um facto que semelha nom lhe importa à empresa que conseguiu o convénio das obras, Audasa. A qualidade do ensino neste curso 2016/2017 neste centro vê-se gravemente prejudicada polos ruídos que as obras provocam a poucos metros.

 

Esta empresa comprometeu-se a construir um novo colégio, já que precisam parte do terreno onde actualmente está o Igreja. Para poder seguir com este projecto e tirar abaixo o centro, a empresa tem que requalificar o terreno com o visto bom da Junta, cousa que aínda nom conseguiu. Se nom o fai antes do 2021, a empresa deixará de ter responsabilidades na construçom do novo colégio, é dizer, nom terám que pagar o novo centro.

 

A situaçom das famílias viu-se gravemente empiorada porque a empresa quere começar já com as obras e, por tanto, pretendem tirar abaixo parte do centro para poder seguir com a ampliaçom dos carris da autoestrada. De novo, a empresa nom conta com o dano que se lhes faria às crianças que estám a seguir com as suas aulas. Com este anúncio, Audasa tem previsto tirar abaixo parte do colégio e levando por diante as caldeiras e umha aula, após umha reestruturaçom do colégio que nom chegaria a manter a qualidade do ensino destas estudantes.

 

A Associaçom de Vizinhas de Chapela convocou umha jornada de manifestaçom para o dia 17 de fevereiro com a que seguir com a pressom social para que os direitos das famílias estejam protegidos e a qualidade da educaçom das crianças nom seja prejudicada. A manifestaçom sairá às 19h desde a rotunda da entrada da auto-estrada em Rande e rematará no colégio Igreja. Desde Erguer. Estudantes da Galiza animamos à participaçom desta protesta e apoiamos publicamente aos agentes que defendem os direitos a umha educaçom pública de qualidade. Recolhemos os lemas da manifestaçom:

 


NOM MAIS PROMESSAS, QUEREMOS FACTOS!

NOVO COLÉGIO IGREJA JÁ!

NOM À ABERTURA DO NOVO CARRIL ATÉ QUE SE CONSTRUA O COLÉGIO!

POLA DIGNIDADE DE CHAPELA SOLICITAMOS A TUA ASSISTÊNCIA!

COMPARTIR/PARTILHARShare on Facebook
Facebook
Tweet about this on Twitter
Twitter

Aínda non hai comentarios

Por que non ser a primeira

Deixa unha resposta

O teu enderezo electrónico non se publicará Os campos obrigatorios están marcados con *